ಸಂಪಾದಕರ ಬರಹ

ಪ್ರಿಯ ಓದುಗರೇ ,
ಕಳೆದ ಸಂಚಿಕೆಯಲ್ಲಿ ಕೈಬರಹದ ಪ್ರಶ್ನೆ ಬಹಳ ಸುಲಭವಾಗಿತ್ತು. ಆದರೂ ಕೇವಲ ಒಬ್ಬರೇ ಒಬ್ಬರು ಬರೆದು ಕಳಿಸಿರುವುದು ಸ್ವಲ್ಪ ಬೇಸರ ತಂದಿದೆ. ಈ ಸಂಚಿಕೆಯಿಂದಲಾದರೂ. ಎಲ್ಲರೂ ಸ್ಪರ್ಧೆಗಳಲ್ಲಿ ಭಾಗವಹಿಸಲು ಪ್ರಯತ್ನಿಸಿ. ಡಾಕ್ಟರ್ ಚಂದ್ರಶೇಖರ್ ರಾವ್ ಅವರು ಕೂಡ ಇದೇ ರೀತಿಯ ಅಭಿಪ್ರಾಯಗಳನ್ನು ಹಂಚಿಕೊಂಡಿದ್ದಾರೆ. ಅದನ್ನು ನೀವು ನಿಮ್ಮ ಅಭಿಪ್ರಾಯಗಳು ವಿಭಾಗದಲ್ಲಿ ನೋಡಬಹುದು.

ಕಳೆದ ಸಂಚಿಕೆಯಲ್ಲಿ ಬಹಳ ಓದುಗರು ಡಾಕ್ಟರ್ ನಾಗೇಶ್ ಅವರ ಮಂಕುತಿಮ್ಮನ ಕಗ್ಗದ ಬಗ್ಗೆ ಮೆಚ್ಚುಗೆ ವ್ಯಕ್ತ ಪಡಿಸಿದ್ದಾರೆ. ಡಾಕ್ಟರ್ ನಾಗೇಶ್ ಅವರಿಗೆ ಅಭಿನಂದನೇಗಳು

ಈ ವರ್ಷದ ನನ್ನ ಹುಟ್ಟುಹಬ್ಬದ ( 25-ಜುಲೈ ) ಅಂಗವಾಗಿ, ಆಸಕ್ತರಿಗಾಗಿ “ಚಾಟ್‌ಜಿಪಿಟಿ ಪರಿಚಯ” ಎಂಬ ಎರಡು ಉಚಿತ ಆನ್‌ಲೈನ್ ತರಗತಿಗಳನ್ನು ನಡೆಸಲು ನಿರ್ಧರಿಸಿದ್ದೇನೆ.

ಪ್ರತಿ ತರಗತಿಯ ಅವಧಿ: 1 ಗಂಟೆ

ಈ ತರಗತಿಗಳಲ್ಲಿ ಚಾಟ್‌ಜಿಪಿಟಿಯನ್ನು ಕನ್ನಡದಲ್ಲಿಯೂ ಹಾಗೂ ಇಂಗ್ಲಿಷ್‌ನಲ್ಲಿಯೂ ಹೇಗೆ ಬಳಸುವುದು, ದೈನಂದಿನ ಜೀವನದಲ್ಲಿ ಮತ್ತು ಬರವಣಿಗೆಯಲ್ಲಿ ಹೇಗೆ ಉಪಯೋಗಿಸಬಹುದು ಎಂಬುದನ್ನು ಸರಳವಾಗಿ ತಿಳಿಸಲಾಗುವುದು.

ಇದು ನನ್ನ ಹುಟ್ಟುಹಬ್ಬದ ಕೊಡುಗೆ. ಯಾವುದೇ ಶುಲ್ಕವಿಲ್ಲ.

ಆಸಕ್ತರು ತಮ್ಮ ಹೆಸರು ಮತ್ತು ಮೊಬೈಲ್ ಸಂಖ್ಯೆಯೊಂದಿಗೆ ನೋಂದಾಯಿಸಬಹುದು. ವಿವರಗಳನ್ನು ಮುಂದೆ ನನ್ನ ಲೇಖನ : ನನ್ನ ಹೊಸ ಗೆಳೆಯ ಚಾಟ್ ಜಿ ಪಿ ಟಿ ಎಂಬುದರಲ್ಲಿ ಕೊಡಲಾಗಿದೆ.

ಸ್ಪರ್ಧಾ ವಿಭಾಗ

ಈ ಸಂಚಿಕೆಯ ಸ್ಪರ್ಧೆ : ಈ ಕೆಳಗೆ ಕೊಟ್ಟಿರುವ ಮಂಡಲ ಚಿತ್ರ ವನ್ನು A4 ಹಾಳೆಯಲ್ಲಿ ಪ್ರಿಂಟ್ ತೆಗೆದು, ಬಣ್ಣಗಳನ್ನು ತುಂಬಿ , ನಿಮ್ಮ ಹೆಸರು ಬರೆದು, ಅದರ ಚಿತ್ರ ತೆಗೆದು ಕಳಿಸಿವುದು . ಆಕರ್ಷಕ ಚಿತ್ರಕ್ಕೆ ಬಹುಮಾನ. (ಈ ಸ್ಪರ್ಧೆಯ ಸಲಹೆ ಕೊಟ್ಟವರು : ಶ್ರೀಮತಿ ಗೌರಿ ಭಟ್ . ಅವರಿಗೆ ಧನ್ಯವಾದಗಳು.)

ನಿಯಮಗಳು

1. ಇದೇ ಮಂಡಲದ ಸ್ಕ್ರೀನ್ ಶಾಟ್ ತೆಗೆದುಕೊಳ್ಳಕೊಂಡು, ಪ್ರಿಂಟ್ ತೆಗೆಯಬೇಕು. ಬೇರೆ ಯಾವುದೇ ಮಂಡಲ ಬೇಡ.

2. software ಅಥವಾ ಅಪ್ ನಿಂದ ಬಣ್ಣ ಹಾಕುವಂತಿಲ್ಲ.

3. A4 ಹಾಳೆಯಲ್ಲಿ ದೊಡ್ಡದಾಗಿ ಪ್ರಿಂಟ್ ತೆಗೆದು, ಸ್ಕೆಚ್ ಪೆನ್ , ಬಣ್ಣದ ಪೆನ್ಸಿಲ್, ಪೇಯಿಂಟ್ ಮುಂತಾದ ಯಾವುದರಿಂದಲಾದರೂ ಬಣ್ಣ ಹಾಕಬಹುದು.

4. ಯಾವ ವಯಸ್ಸಿನವರಾದರೂ ಭಾಗವಹಿಸಬಹುದು . ನಿಮ್ಮ ಹೆಸರು ಬರೆಯುವುದನ್ನು ಮರೆಯಬೇಡಿ .

5. ಕಳುಹಿಸಲು ಕೊನೆಯ ದಿನಾಂಕ : 25- 09-2026.

ಕೈಬರಹ ಸ್ಪರ್ಧೆಯ ಉತ್ತರ

ಬರೆದಿರುವವರು : ಶ್ರೀಮತಿ ಸುಮಾ ಆನಂದ್

ಶ್ರೀಮತಿ ಸುಮಾ ಆನಂದ್ ಅವರಿಗೆ ಬಹುಮಾನ ಲಭಿಸಿದೆ. ಅವರಿಗೆ ಅಭಿನಂದನೆಗಳು.

ಪದಬಂಧ

ಎರಡೂ ಸರಿ ಉತ್ತರ ಬರೆದವರು :

1) ಶ್ರೀಮತಿ ಸೌಮ್ಯ ನಾಗರಾಜ್

ಒಂದು ಸರಿ ಉತ್ತರ ಬರೆದವರು :

1) ಶ್ರೀಮತಿ ಸುಬ್ಬಲಕ್ಷ್ಮಿ ಎಸ್ ರಾವ್

2) ಶ್ರೀಮತಿ ಸುಮಾ ಆನಂದ್

ಭಾಗವಹಿಸಿದ ಎಲ್ಲರಿಗೂ ಅಭಿನಂದನೆಗಳು

ವಿಚಾರ : ಮೆದುಳಿಗೆ ವ್ಯಾಯಾಮ

ರಾಮು ಮಾಸ್ತರು ಮತ್ತು ವಿದ್ಯಾರ್ಥಿಗಳು – ಪ್ರಶ್ನೆಮಾಲೆ – ಭಾಗ -1

ಮೆದುಳಿಗೂ ವ್ಯಾಯಾಮ ಬೇಕು. ದೇಹಕ್ಕೆ ಪ್ರತಿದಿನ ವ್ಯಾಯಾಮ ಮಾಡಿದಂತೆ, ನಮ್ಮ ಆಲೋಚನಾ ಶಕ್ತಿ, ನೆನಪಿನ ಶಕ್ತಿ ಮತ್ತು ತಾರ್ಕಿಕ ಚಿಂತನೆ ಹೆಚ್ಚಲು ಮೆದುಳಿಗೂ ಸ್ವಲ್ಪ ಕೆಲಸ ಕೊಡಬೇಕು.

ಅದಕ್ಕಾಗಿ ಈ ಸಂಚಿಕೆಯಿಂದ “ರಾಮು ಮಾಸ್ತರು ಮತ್ತು ವಿದ್ಯಾರ್ಥಿಗಳು“ ಎಂಬ ಹೊಸ ಪ್ರಶ್ನೆ ಮಾಲೆಯನ್ನು ಆರಂಭಿಸುತ್ತಿದ್ದೇನೆ . ಪ್ರತಿ ತಿಂಗಳು ರಾಮು ಮಾಸ್ತರು( ನಾನು ) ತಮ್ಮ ವಿದ್ಯಾರ್ಥಿಗಳಿಗೆ (ಓದುಗರಿಗೆ) 5 ರಿಂದ 8 ಕುತೂಹಲಕಾರಿ ಪ್ರಶ್ನೆಗಳನ್ನು ಕೇಳುತ್ತಾರೆ. ಆ ಪ್ರಶ್ನೆಗಳಿಗೆ ಮೊದಲು ನೀವೇ ಉತ್ತರ ಹುಡುಕಲು ಪ್ರಯತ್ನಿಸಿ. ನಂತರ ನಿಮ್ಮ ಉತ್ತರವನ್ನು ಕುಟುಂಬದವರ ಅಥವಾ ಸ್ನೇಹಿತರೊಂದಿಗೆ ಚರ್ಚಿಸಿ. ಮುಂದಿನ ಸಂಚಿಕೆಯಲ್ಲಿ ಸರಿಯಾದ ಉತ್ತರಗಳನ್ನು ಮತ್ತು ಎಲ್ಲಾ ಪ್ರಶ್ನೆಗಳಿಗೆ ಸರಿ ಉತ್ತರ ನೀಡಿದವರ ಹೆಸರನ್ನು ಪ್ರಕಟಿಸಲಾಗುವುದು.

ದಯವಿಟ್ಟು ಇಂಟರ್ನೆಟ್ ಮುಂತಾದವುಗಳನ್ನು ನೋಡಿ ಉತ್ತರ ಪಡೆಯುವುದು ಬೇಡ. ನಿಮ್ಮ ಮೆದುಳಿಗೆ ಆಗ ವ್ಯಾಯಾಮವೇ ಆಗುವುದಿಲ್ಲ. ಇದಕ್ಕೇನು ಬಹುಮಾನವಿಲ್ಲ. ನಿಮಗೆ ಕೆಲವು ಪ್ರಶ್ನಾವಳಿಗಳ ಮೂಲಕ ಉತ್ತಮ ವಿಚಾರಗಳನ್ನು ತಿಳಿಸುವ ಉದ್ದೇಶದಿಂದಲೇ ನಾನು ಇದನ್ನು ಪ್ರಾರಂಭಿಸಿದ್ದೇನೆ.

ವಯಸ್ಸು ಎಷ್ಟೇ ಆಗಿರಲಿ, ಕಲಿಯುವುದಕ್ಕೂ ಯೋಚಿಸುವುದಕ್ಕೂ ವಯಸ್ಸಿನ ಮಿತಿಯಿಲ್ಲ. ಬನ್ನಿ, ಪ್ರತೀ ತಿಂಗಳು ನಮ್ಮ ಮೆದುಳಿಗೆ ಸ್ವಲ್ಪ ವ್ಯಾಯಾಮ ಮಾಡಿಸೋಣ! 😊

ಕಥಾ ಪ್ರಶ್ನೆ ಮಾಲೆ

1) ಶಬರಿ

ಮಾಸ್ಟರ್ ಹುಡುಗರಿಗೆ ರಾಮಾಯಣದ ಶಬರಿ ಕಥೆಯನ್ನು ವಿವರವಾಗಿ ಹೇಳುತ್ತಾರೆ. ನಂತರ ಒಂದು ಚಿಕ್ಕ ಕಥೆ ಹೇಳುತ್ತಾರೆ. ಒಬ್ಬ ಬೇರೆ ದೇಶದವನು ನಮ್ಮ ರಾಜ್ಯಕ್ಕೆ ಬಂದು ಕನ್ನಡ ಕಲಿಯುತ್ತಾನೆ ಆದರೆ ಅವನಿಗೆ ರಾಮಾಯಣದ ಕಥೆ ಸರಿಯಾಗಿ ತಿಳಿದಿರುವುದಿಲ್ಲ. ಅವನ ಶಾಲೆಯಲ್ಲಿ ಟೀಚರ್ ಅವನನ್ನು ಕಳೆದು ಕೇಳುತ್ತಾರೆ : ರಾಮಾಯಣದಲ್ಲಿ ಕಾಡಿನಲ್ಲಿ ರಾಮನಿಗಾಗಿ ಕುಳಿತ ವೃದ್ಧ ಭಕ್ತೆಯ ಹೆಸರೇನು ? ಅವನು ಗೊತ್ತಾಗಡೆ ಗೆಳೆಯನ ಕಡೆ ನೋಡುತ್ತಾನೆ. ಟೀಚರ್ ಅತ್ತ ತಿರುಗಿ ನೀರು ಕುಡಿಯುವ ಹೊತ್ತಿಗೆ ಅವನ ಗೆಳೆಯ ಅವನ ಕಿವಿಯಲ್ಲಿ ಶಬರಿ ಎಂದು ಹೇಳುತ್ತಾನೆ. ನಂತರ ಆ ಬೇರೆ ದೇಶದವನು ಬೋರ್ಡಿನ ಮೇಲೆ “ಶ” ಎಂಬ ಅಕ್ಷರವನ್ನು ಮಾತ್ರ ಬರೆಯುತ್ತಾನೆ .

ಮಾಸ್ಟರ್ ಈ ಕಥೆಯ ನಂತರ ಹುಡುಗರನ್ನು ಕೇಳುತ್ತಾರೆ ಅವನು ಏಕೆ ಹಾಗೆ ಬರೆದ?

2) ಮಾಸ್ಟರ್ ಬೋರ್ಡಿನ ಮೇಲೆ ಎಲ್ಲರಿಗೂ ತಿಳಿದಿರುವ ಈ ವಾಕ್ಯವನ್ನು ಬರೆಯುತ್ತಾರೆ

ಮಾವನವರು ಮಗಳನ್ನು ಚೆನ್ನಾಗಿ ಬೆಳೆಸಿದ್ದಾರೆ

– ಈ ವಾಕ್ಯದ ವಿಶೇಷವೆಂದರೆ ಕೆಲವು ಅಕ್ಷರಗಳನ್ನು ತೆಗೆದು ಬೇರೆ ಅರ್ಥ ಕೊಡುವಂತೆ ಮಾಡಬಹುದು ಎಂದು ಹೇಳಿ ಮೊದಲನೇ ಪದದಲ್ಲಿರುವ ” ವ” ತೆಗೆಯುತ್ತಾರೆ ಹಾಗು ಎರಡನೇ ಪದಕ್ಕೆ “ಮ” ನಂತರ “ರ” ಸೇರಿಸುತ್ತಾರೆ: ಈಗ ಅದು

– ಮಾನವರು ಮರಗಳನ್ನು ಜೆನ್ನಾಗಿ ಬೆಳೆಸಿದ್ದಾರೆ. ಎಂದಾಗುತ್ತದೆ. ಇದರಲ್ಲಿರುವ ಯಾವುದೇ ಪದಗಳನ್ನು ಬಳಸದೆ, ಇನ್ನೊಂದು ವಾಕ್ಯವನ್ನು ಬರೆಯಿರಿ ಎಂದು ಹೇಳುತ್ತಾರೆ

3) ಮಾಸ್ತರರ ಮೂರನೆಯ ಪ್ರಶ್ನೆ : ಸೂರ್ಯನ ಅಳತೆ, ಭೂಮಿಯ ಅಳತೆಯ ಸುಮಾರು X ನಷ್ಟು, ಭೂಮಿ, ಸೂರ್ಯನ ನಡುವಿನ ಅಂತರ, ಸೂರ್ಯನ ಅಳತೆಯ Xನಷ್ಟು. ಹಾಗಾದರೆ x=?

4) 200 ಮಾವಿನ ಹಣ್ಣು ಹಿಡಿಸುವ ಒಂದು ದೊಡ್ದ ಬುಟ್ಟಿಯಲ್ಲಿ ಏಷ್ಟೊ ಮಾವಿನ ಹಣ್ಣುಗಳಿತ್ತು . 5 ಜನಗೆಳೆಯರು ಸಮನಾಗಿ ಹಂಚಿಕೊಂಡರು. ನಂತರ ಇನ್ನು ಇಬ್ಬರು ಗೆಳೆಯರು ಬಂದರು. ಮತ್ತೆ ಸಮನಾಗಿ ಹಂಚಿಕೊಂಡರು. ಆದರೆ, ಅವರೆಲ್ಲರ ಇನ್ನೊಬ್ಬ ಆಪ್ತ ಗೆಳೆಯನು, ಒಬ್ಬ ಭಿಕ್ಷುಕನನ್ನು ಕರೆದುಕೊಂಡು ಬಂದನು. ಭಿಕ್ಷುಕನಿಗೆ 4 ಮಾವಿನ ಹಣ್ಣುಗಳನ್ನು ಕೊಡಿಸಿ ಕಳುಹಿಸಿದನು. ನಂತರ ಉಳಿದ ಮಾವಿನ ಹಣ್ಣನ್ನು ಎಲ್ಲಾ 8 ಜನರೂ ಸಮನಾಗಿ ಹಂಚಿಕೊಂಡರು. ಹಾಗಾದರೆ, ಒಬ್ಬೊಬರಿಗೆ ಎಷ್ಟು ಹಣ್ಣು ಬಂದಿತು?.

5) ಮಾಸ್ಟರ್ ಈಗ ಗಡಿಯಾರದ ಕಥೆಯನ್ನು ಹೇಳುತ್ತಾರೆ.ರಾಮ ಮತ್ತು ಭೀಮ ಇಬ್ಬರು, ಹೆಚ್ಚು ಬೆಲೆ ಬಾಳುವ ಒಳ್ಳೆಯ ಕಂಪನಿಯ ಡಿಜಿಟಲ್ ಕೈ ಗಡಿಯಾರಗಳನ್ನು ತೆಗೆದುಕೊಳ್ಳುತ್ತಾರೆ. ಸಂಜೆ ಇಬ್ಬರೂ ಅವುಗಳನ್ನು ಕಟ್ಟಿಕೊಂಡು ವಾಕಿಂಗ್ ಹೋಗುತ್ತಾರೆ. ಇಬ್ಬರೂ ಒಟ್ಟಿಗೆ ಒಂದೇ ದೂರವನ್ನು ಕ್ರಮಿಸಿದ ನಂತರ, ರಾಮನ ಗಡಿಯಾರ 2,500 ಹೆಜ್ಜೆ ಮತ್ತು ಭೀಮನ ಗಡಿಯಾರ 2300 ಹೆಜ್ಜೆ ಎಂದು ತೋರಿಸುತ್ತದೆ. ಮಾಸ್ಟರ್ ಕೇಳುತ್ತಾರೆ ಇದು ಹೇಗೆ ಸಾಧ್ಯ?

6) ಮಾಸ್ಟರ್ ಮತ್ತೊಂದು ಚಿಕ್ಕ ಕಥೆಯನ್ನು ಹೇಳಿ, ಪ್ರಶ್ನೆ ಕೇಳುತ್ತಾರೆ. ಒಬ್ಬ ಸಾಹುಕಾರ ವ್ಯಾಪಾರಿ , ಮಾಸ್ಕೋದಲ್ಲಿ ಸರಿಯಾಗಿ ಒಂದು ಕೆಜಿ ಚಿನ್ನವನ್ನು ತೆಗೆದುಕೊಳ್ಳುತ್ತಾನೆ. ಎರಡೆರಡು ಬಾರಿ ನಿಖರವಾಗಿ ಅಳತೆ ಮಾಡಿಸುತ್ತಾನೆ. ನಂತರ ಅದನ್ನು ಜೋಪಾನವಾಗಿ ಬೆಂಗಳೂರಿಗೆ ತಂದು, ಇಲ್ಲಿ ತೂಕ ಮಾಡಿಸಿದಾಗ 2.5 ಗ್ರಾಂ ಕಡಿಮೆ ಬರುತ್ತದೆ. ಮತ್ತೊಮ್ಮೆ ನಿಖರವಾಗಿ ತೂಕ ಮಾಡಿಸಿದಾಗಲೂ ಹಾಗೆಯೇ ಆಗುತ್ತದೆ. ಏಕೆ?

ಎಲ್ಲಾ ಪ್ರಶ್ನೆಗಳಿಗೆ ಉತ್ತರ ಬಂದರೆಮಾತ್ರ ಕಳಿಸಬೇಕೆಂದಏನೂ ಇಲ್ಲ . ಒಂದೇ ಒಂದು ಉತ್ತರ ಗೊತ್ತಿದ್ದರೂ ಕಳಿಸಿ .

ಅಧ್ಯಾತ್ಮ ವಿಭಾಗ

ಶ್ರೀ ರಾಮ ದೇವರ ಹಾಡು –

ಹಾಡಿರುವವರು – ಶ್ರೀಮತಿ ಗೀತಾ ಕೃಷ್ಣಮೂರ್ತಿ

ಈ ಕೆಳಗಿನ ಲಿಂಕ್ ಒತ್ತಿ ಕೇಳಿ

ಈ ಕೆಳಗಿನ ಲಿಂಕ್ ಒತ್ತಿ ಕೇಳಿ

ಹೊಸ ರುಚಿ ವಿಭಾಗ

ಕಡ್ಲೆಪುರಿ ನುಚ್ಚಿನ ಉಂಡೆ

 ಇದು ಮೈಯಿಗೆ ತುಂಬಾ ಒಳ್ಳೆಯದು .ಶುಗರ್ ಇರೋರಿಗೆ ಒಳ್ಳೆಯದು .ನೆನೆಸುವಷ್ಟು ಇಲ್ಲ, ಕರೆಯುವಷ್ಟು ಇಲ್ಲ. ಮಾಡೋದು ತುಂಬಾ ಸುಲಭ.

 ಬೇಕಾಗುವ ಸಾಮಾನುಗಳು

– ಒಂದು ಲೀಟರ್ ಕಡ್ಲೆಪುರಿ

–ಒಂದು ಕಪ್ಪು ಕ್ಯಾರೆಟ್ ತುರಿ,

–ಎರಡು ಈರುಳ್ಳಿ ಸಣ್ಣಗೆ ಹೆಚ್ಚಿದ್ದು

–ಕರಿಬೇವು,

–ಐದಾರು ಹಸಿಮೆಣಸಿನಕಾಯ

– ಒಂದು ಚೂರು ಶುಂಠಿ

– ಸಣ್ಣ ಕಪ್ಪು ಚಿರೋಟಿ ರವೆ ,

–ಒಂದು ಕಪ್ಪು ಕಾಯಿತುರಿ (ಕಾಯಿಚೂರುಗಳನ್ನು ಹಾಕಿ ಮಾಡಬಹುದು)

– ಕಲಸುವುದಕ್ಕೆ ಮೊಸರು

–ಸ್ವಲ್ಪ ಕೊತ್ತಂಬರಿ ಸೊಪ್ಪು

 ಮಾಡುವ ವಿಧಾನ

ಮೊದಲು ಪುರಿಯನ್ನು ನೀರಿನಲ್ಲಿ ಅದ್ದಿ ತೆಗೆದಿಡಬೇಕು ಇದಕ್ಕೆ ಎಲ್ಲಾ ಹಾಕಿ ಮಿಕ್ಸ್ ಮಾಡಬೇಕು ಗುಂಡಿಗೆ ಬರುವಷ್ಟು ರವೆ ಹಾಕಬೇಕು ಆಮೇಲೆ ಮೊಸರು ಹಾಕಿ ಚೆನ್ನಾಗಿ ಕಲಸಬೇಕು ಸಣ್ಣದಾಗಿ ಉಂಡೆ ಮಾಡಿ ಇಡ್ಲಿ ಪಾತ್ರೆಯಲ್ಲಿ 10 ನಿಮಿಷ ಬೇಯಿಸಬೇಕು ಬೇಕಾದರೆ ಕಾಯಿ ಚಟ್ನಿ ಮಾಡಿಕೊಳ್ಳಬಹುದು. ಮಾಡಿ ನೋಡಿ ಹೇಗಿದೆ ಎಂದು ತಿಳಿಸಿ.

ಕಥೆ, ಕವನ ವಿಭಾಗ

ಸ್ನೇಹ ಸಂಪತ್ತು

ಭಾವಗಳೇ  ಹೂವಾಗಿ ಅರಳುವ  ವನ
ಸಾಂತ್ವನದ ಗಣಿ ಹೊತ್ತ ಅನುರಾಗದ ಕಿರಣ…

ತಪ್ಪುಗಳ ತಿದ್ದಿ , ಮಾರ್ಗ  ತೋರುವ  ಅಂತರಂಗದ ಕನ್ನಡಿ..
ಮಾತೆಯ ಮಮತೆಯ ಒಲವಿನ ಹೊನ್ನುಡಿ ..

ಕಾಲದ ಜೊತೆ ಮಾಗುತ್ತ , 
ಅನುಬಂಧದ ರುಚಿ ಹೆಚ್ಚಿಸುವ ಚೇತನ.. 
 
ಮತ್ತೊಮ್ಮೆ ಜನ್ಮತಳೆವ  ಆಸೆ ,  ಈ ಧರೆಯಲಿ…
ನಿನ್ನದೇ ನಿಷ್ಕಲ್ಮಶ ಸ್ನೇಹದ ಪವಿತ್ರ ಒಡಲಲಿ ……

ಈ ನನ್ನ ಹುಟ್ಟುಹಬ್ಬದ ( 25/07) ನಂತರ ಈ ಸಂಚಿಕೆಯಲ್ಲಿ, ಆಸಕ್ತಿ ಇರುವವರೊಂದಿಗೆ ಈ ಹೊಸ ಗೆಳೆಯನ ಪರಿಚಯವನ್ನು ಹಂಚಿಕೊಳ್ಳಲು ನಾನು ಬಯಸುತ್ತೇನೆ. ಜ್ಞಾನವನ್ನು ಹಂಚಿಕೊಳ್ಳುವುದು ಕೂಡ ಒಂದು ಸಂತೋಷದ ಅನುಭವ.

ಹೊಸ ತಂತ್ರಜ್ಞಾನವನ್ನು ಭಯದಿಂದಲ್ಲ, ಕುತೂಹಲದಿಂದ ಸ್ವೀಕರಿಸೋಣ.

ಉಚಿತ ಆನ್‌ಲೈನ್ ಚಾಟ್‌ಜಿಪಿಟಿ ತರಬೇತಿ

ಆಸಕ್ತರಿಗಾಗಿ ಎರಡು ಉಚಿತ ಆನ್‌ಲೈನ್ ತರಗತಿಗಳನ್ನು ನಡೆಸಲಾಗುವುದು. ಪ್ರತಿ ತರಗತಿಯ ಅವಧಿ ಒಂದು ಗಂಟೆ. ಆಸಕ್ತರು ಆಗಸ್ಟ್ 15ರೊಳಗೆ ತಮ್ಮ ಹೆಸರು ಮತ್ತು ಮೊಬೈಲ್ ಸಂಖ್ಯೆಯನ್ನು ಈ ಕೆಳಗಿನ ಫಾರಂ ಮೂಲಕ ಅಥವಾ ನನ್ನ what’s app ಮೂಲಕ ನೋಂದಾಯಿಸಬಹುದು. ನೋಂದಾಯಿಸಿದವರಿಗೆ ದಿನಾಂಕ, ಸಮಯ ಮತ್ತು ಆನ್‌ಲೈನ್ ಲಿಂಕ್ ನಂತರ ತಿಳಿಸಲಾಗುವುದು.

ಈ ಕೆಳಗಿನ ಫಾರಂ ಅನ್ನು ತುಂಬಿ, submit ಬಟನ್ ಒತ್ತಿ .

ಚಿತ್ರಕಲೆ ಹಾಗೂ ಇತರ ಕಲೆಗಳ ವಿಭಾಗ

ದ ರಾ ಬೇಂದ್ರೆ ಅವರು ಕನ್ನಡದ ಅತ್ಯಂತ ಉನ್ನತ ಮಟ್ಟದ ಕವಿ. 1896 ಜನಿಸಿ 1981ರ ವರೆಗೂ ಬಾಳಿದ ಅವರ ಕನ್ನಡಸಾಹಿತ್ಯಕ್ಕೆ ನೀಡಿದ ಕೊಡಿಗೆ ಅಪಾರವಾದದ್ದು.

ಪದ್ಮಶ್ರೀ,ಜ್ಞಾನಪೀಠ ,ಸಾಹಿತ್ಯ ಅಕಾಡೆಮಿ ಈ ರೀತಿ ಹಲವಾರು ಪ್ರಶಸ್ತಿಗಳನ್ನು ಪಡೆದು ಕನ್ನಡ ಭಾಷೆಯ ಮತ್ತು ಸಾಹಿತ್ಯದ ಅಭಿವೃದ್ಧಿಗೆ ಸುಮಾರು 70. ವರ್ಷಗಳ ಕಾಲ ದುಡಿದರು.

ಶ್ರೀ ಜಯರಾಂ ಕೆ ವಿ ಆವರು ರಚಿಸಿದ ಇನ್ನೊಂದು ಚಿತ್ರಕಲೆ, ಮತ್ತು ಬರಹ

ಈ ಭಾವಚಿತ್ರವು ಒಬ್ಬ ಸಂದರ್ಶಕಿಯದ್ದು – ಬಹುಶಃ ಇರಾನಿನ ಹುಡುಗಿ – ವಿಶ್ವಕಪ್ ಫುಟ್ಬಾಲ್ ಪಂದ್ಯವನ್ನು ವೀಕ್ಷಿಸುತ್ತಿದ್ದಾಗ, ಒಬ್ಬ ಛಾಯಾಗ್ರಾಹಕ ಅವಳನ್ನು ಕ್ಯಾಮೆರಾ ಮೂಲಕ ತೋರಿಸುತ್ತಿದ್ದನು. ಅವಳು ಎಲ್ಲಾ ಕಣ್ಣುಗಳ ಆಕರ್ಷಣೆ ತನ್ನತ್ತ ಬೀರಿದೆ ಎಂದು ಅರಿತುಕೊಂಡ ತಕ್ಷಣ , ಕಣ್ಣು ಮುಚ್ಚಿ ಸುಂದರವಾದ ನಗುವನ್ನು ಬೀರಿದಳು.

ಶ್ರೀ ಎಸ್ ವಿಠ್ಠಲ ರಾವ್ ಅವರು ರಚಿಸಿದ ಚಿತ್ರಕಲೆಗಳು

ಶ್ರೀಮತಿ ಮೀರಾ ಜಯರಾಂ ಅವರು ರಚಿಸಿರುವ ಚಿತ್ರಕಲೆಗಳು

ವಾರ್ಲಿ ಕಲೆ- ಚಿತ್ರಗಳು

ಕುಮಾರಿ ತೀಕ್ಷ್ಣ ಅವರು ರಚಿಸಿರುವ ಚಿತ್ರಕಲೆಗಳು

ಶ್ರೀಮತಿ ಮಯೂರಿ ಮತ್ತು ಶ್ರೀಮತಿ ಶಾಂಭವೀ ಅವರು ಮಾಡಿರುವ ನೂತನ ಬ್ಯಾಗ್ ಗಳು

( ಇದು ಚಿತ್ರಕಲೆಯಲ್ಲ , ಈ ಬ್ಯಾಗ್ ಗಳು ಕೊಳ್ಳಲು ಸಿಗುತ್ತವೆ ) .ಇವರ ಇನ್ಸ್ಟಾಗ್ರಾಂ ಲಿಂಕ್, ಹಾಗೂ ಇವರ ತಂಬೂಲಮ್ ಟೇಲ್ಸ್ ಬಗ್ಗೆ ಹಿಂದಿನ ಸಂಚಿಕೆಯಲ್ಲಿ ಕೊಡಲಾಗಿದೆ.

ಮನೆಯಲ್ಲಿ ಅರಳಿದ ಪರಿಜಾತದ ಹೂ ಗಳಿಂದ ರಂಗೋಲಿ : – ಶ್ರೀಮತಿ ಗೀತಾ ಕೃಷ್ಣಮೂರ್ತಿ

ಸುದ್ಧಿ ವಿಭಾಗ

ತುಮಕೂರು ಜಿಲ್ಲೆ ಗುಬ್ಬಿ ತಾಲೂಕು ನಿಟ್ಟೂರು ಹೋಬಳಿ ಎಂ ಎನ್ ಕೋಟೆಯಲ್ಲಿ ನೆಲೆಸಿರುವ ಶ್ರೀ ಲಕ್ಷ್ಮಿ ರಂಗನಾಥ ಸ್ವಾಮಿಯ ಬ್ರಹ್ಮರಥೋತ್ಸವವು ಪ್ರತಿ ವರ್ಷ  ಆಷಾಢ ಮಾಸ ಶುಕ್ಲ ಪಕ್ಷ ದ್ವಾದಶಿಯಂದು ನಡೆಯುತ್ತದೆ . ಇದರ ಎಲ್ಲಾ ಕಾರ್ಯಕ್ರಮಗಳನ್ನು ಮೂಗನಾಯಕನ ಕೋಟೆಯ ಶಾನುಭೋಗರ ಮನೆಯವರು ನಡೆಸುತ್ತಾರೆ.

 ವಿಶೇಷವಾಗಿ ಏಕಾದಶಿಯಂದು ಧನುಸ್ಸು (ಕಬ್ಬಿಣದ ಬಿಲ್ಲು ಮತ್ತು ಬಾಣ,ಸುಮಾರು  200 ಕೆಜಿ) ಎತ್ತುವ ಕಾರ್ಯಕ್ರಮವು ನಡೆಯುತ್ತದೆ. ಮುಳ್ಳಿನ ಪಲ್ಲಕ್ಕಿ ಉತ್ಸವ ನಡೆಯುತ್ತದೆ .ಬೆಳಗ್ಗೆಯಿಂದ ಉಪವಾಸವಿದ್ದು 
 ಅಂದು  ಶ್ರದ್ಧಾ ಭಕ್ತಿಯಿಂದ ನಾಯಕ ಜನಾಂಗದ ಪಾಂಡುರಂಗಯ್ಯ ಎಂಬ ವ್ಯಕ್ತಿ ದೇವತಾ ಕೆಲಸವನ್ನು ನೆರವೇರಿಸುತ್ತಾರೆ.

 

 ಶ್ರೀ ಲಕ್ಷ್ಮಿ ರಂಗನಾಥ ಸ್ವಾಮಿಯ ಕಲ್ಯಾಣ ಉತ್ಸವವು ನಡೆಯುತ್ತದೆ.

ಬೆಳಗ್ಗೆ ದ್ವಾದಶಿಯಂದು , ಶ್ರೀ ಲಕ್ಷ್ಮಿ ರಂಗನಾಥ ಸ್ವಾಮಿಯನ್ನು ಊರಿನ ರಾಜಬೀದಿಗಳಲ್ಲಿ ಮೆರವಣಿಗೆ ಮಾಡಿ ರಥೋತ್ಸವದಲ್ಲಿ ಕುಳ್ಳಿರಿಸಿ, ತದನಂತರ ಗ್ರಾಮ ದೇವತೆಗಳಾದ ಕೊಲ್ಲಾಪುರದಮ್ಮ ಮತ್ತು ಕೆಂಪಮ್ಮ (ಸಾಗಸಂದ್ರದಮ್ಮ) ದೇವರುಗಳು ಬರುತ್ತವೆ.

ನಂತರ, ಗೋವಿಂದ ನಾಮಸ್ಮರಣೆಯಿಂದ ರಥವನ್ನು ಎಳೆಯುತ್ತಾರೆ.

ನಿಮ್ಮ ಅಭಿಪ್ರಾಯಗಳು

ಡಾಕ್ಟರ್ ಚಂದ್ರಶೇಖರ್ ರಾವ್ ಅವರ ಅಭಿಪ್ರಾಯಗಳು

ನಾನು ಸ್ಪರ್ಧೆಯಲ್ಲಿ ಭಾಗವಹಿಸುವುದು ಬೇಡವೆಂದುಕೊಂಡಿದ್ದರು ಸಹ, ರಾಮಾಯಣ ಮಹಾಭಾರತ ಕಾಲದಲ್ಲಿ ಮೊಬೈಲ್ ಇದ್ದಿದ್ದರೆ ಎಂಬ ಸ್ಪರ್ಧೆಯು ನನ್ನನ್ನು ತುಂಬಾ ಪ್ರೇರೇಪಿಸಿ ಭಾಗವಹಿಸುವಂತೆ ಮಾಡಿತು.

ಆದರೆ, ಇಂತಹ ಉತ್ತಮ ಸ್ಪರ್ಧೆಗಳುಳ್ಳ ಈ ಸಂಚಿಕೆಯಲ್ಲಿ. ಕೇವಲ ಕೆಲವರು ಮಾತ್ರ ಭಾಗವಹಿಸುತ್ತಿರುವುದು ವಿಷಾದನೆಯವೇ ಸರಿ. ಅದಕ್ಕಾಗಿ ನನ್ನ ಪುಟ್ಟ ಸಲಹೆಯನ್ನು ಇಲ್ಲಿ ಕೊಟ್ಟಿದ್ದೇನೆ.

ಸ್ಪರ್ಧಿಸಲು ತುಂಬಾ ಜನ ಭಾಗವಹಿಸಲಿ ಅಂತ ನಮ್ಮೆಲ್ಲರ ಆಶಯ, ಆದರೆ ಅದು ಯಾಕೋ ತುಂಬಾ ಕಡಿಮೆ ಜನ ಭಾಗವಹಿಸುತ್ತಿದ್ದಾರೆ ಏನಾದರೂ ಮಾಡಿ ಭಾಗವಹಿಸುವವರನ್ನು ಹೆಚ್ಚಿಗೆ ಭಾಗವಹಿಸಲು ಪ್ರೋತ್ಸಾಹಿಸಲು ನಾವು ಪ್ರಯತ್ನಿಸಬೇಕು ಇದಕ್ಕಾಗಿ ನನ್ನ ಸಲಹೆಗಳಿವೆ .

1)ಮೊದಲನೇದಾಗಿ ಬಹುಮಾನಗಳನ್ನು ಹೆಚ್ಚಿಸುವುದು. ಒಂದೋ ,ಎರಡೊ ಬಹುಮಾನ ಇರುವುದರಿಂದ ಹೀಗಾಗಿತ್ತಿದೆಯೇ ?ಅದನ್ನು ನೋಡಿ ಸರಿಯಾಗಿ ತೀರ್ಮಾನ ಮಾಡಬೇಕು. ಆದರೆ, ಅದಕ್ಕೆ ಹೆಚ್ಕು ಹಣ ಬೇಕಾಗುತ್ತದೆ.

2) ಹೆಚ್ಚು ಜನರು ಬಹುಮಾನಗಳನ್ನು ಕೊಡುವವರು ಮುಂದೆ ಬಂದರೆ ಸಾಧ್ಯವಾಗುತ್ತದೆ .

ದಯವಿಟ್ಟು ಎಲ್ಲಾ ಸ್ಪರ್ಧೆಗಳಲ್ಲೂ ಭಾಗವಹಿಸಿ. ಧನ್ಯವಾದಗಳು – ಜಯರಾಂ ಎ ಎಸ್